ಜಾತಿ, ಆದಾಯ ಪತ್ರ ಆನ್‌ಲೈನ್‌ನಲ್ಲಿ ಲಭ್ಯ

0
167
loading...

ಎ.ಎಚ್‌.ಖಾಜಿ
ಶಿರಹಟ್ಟಿ: ಇದುವರೆಗೆ ನಾಡ ಕಚೇರಿ, ತಹಶೀಲ್ದಾರ್‌ ಕಚೇರಿಯಲ್ಲಿ ಮಾತ್ರ ದೊರಯುತ್ತಿದ್ದ ಜಾತಿ, ಆದಾಯ, ನಿವಾಸಿ ಪ್ರಮಾಣ ಪತ್ರಗಳು ಈಗ ಆನ್‌ಲೈನ್‌ನಲ್ಲಿ ದೊರಯುತ್ತಿದ್ದು ಅದಕ್ಕಾಗಿ ದಿನಪೂರ್ತಿ ಸಾರ್ವಜನಿಕರು ಕಚೇರಿ ಎದುರು ಸರದಿಯಲ್ಲಿ ನಿಲ್ಲುವ ತೊಂದರೆ ನಿವಾರಣೆ ಆದಂತಾಗಿದೆ.
ಶಾಲೆಗೆ ಸೇರುವಾಗ ಶುಲ್ಕ ವಿನಾಯಿತಿ ಪಡೆಯಲು, ವಿವಿಧ ಇಲಾಖೆಯ ಸೌಲಭ್ಯ ಪಡೆಯುವದಕ್ಕೆ, ಸ್ಕಾಲರಶಿಪ್‌ ಪಡೆಯುವದಕ್ಕೆ, ಬಿಪಿಎಲ್‌,ಎಪಿಎಲ್‌ ಕಾರ್ಡ್‌ಗೆ, ವೇತನ ಪಡೆಯಲು, ತೆರಿಗೆ ಕಟ್ಟುವುದಕ್ಕೆ ಸೇರಿದಂತೆ ಹಲವು ಕೆಲಸಕ್ಕಾಗಿ ಜಾತಿ, ಆದಾಯ ಪ್ರಮಾಣ ಪತ್ರ ಸಾರ್ವಜನಿಕರಿಗೆ ಅಗತ್ಯವಿದೆ. ಅದು ಈವರೆಗೆ ನಾಡ ಕಚೇರಿ, ತಹಶೀಲದಾರ ಕಚೇರಿಯಲ್ಲಿ ಮಾತ್ರ ಸಿಗುತ್ತಿತ್ತು. ಪ್ರಮಾಣ ಪತ್ರಗಳನ್ನು ಪಡೆಯಲು ಜನರು ಸರತಿಯಲ್ಲಿ ನಿಲ್ಲುವ ಸ್ಥಿತಿ ಇತ್ತು.
ಕಂದಾಯ ಇಲಾಖೆ ರಾಜ್ಯದ 800 ನಾಡ ಕಚೇರಿಗಳ ಮೂಲಕ ಪ್ರತಿವರ್ಷ ಒಂದು ಕೋಟಿ ಪ್ರಮಾಣ ಪತ್ರ ವಿತರಿಸಲಾಗುತ್ತಿದೆ. ಪ್ರಮಾಣ ಪತ್ರ ಪಡೆಯುವದಕ್ಕಾಗಿ ಜನರು ಕಚೇರಿ ಅಲೆಯುವದನ್ನು ತಪ್ಪಿಸುವದಕ್ಕಾಗಿ ಆನ್‌ಲೈನ್‌ ಪ್ರಮಾಣ ಪತ್ರ ವ್ಯವಸ್ಥೆ ಜಾರಿಗೊಳಿಸಿದೆ. ಅದಕ್ಕಾಗಿ ರಾಜ್ಯದ ಗ್ರಾಮಲೆಕ್ಕಿಗರು ಪ್ರತಿ ಮನೆಗೆ ಭೇಟಿ ನೀಡಿ ರಾಜ್ಯದ ನಾಲ್ಕು ಕೋಟಿ ಜನ,80 ಲಕ್ಷ ಕುಟುಂಬದ ಜಾತಿ, ಆದಾಯ, ನಿವಾಸಿ ದೃಢಿಕರಣ ಆನ್‌ಲೈನ್‌ನಲ್ಲಿ ದಾಖಲಿಸಿದ್ದಾರೆ. ಪರಿಣಾಮವಾಗಿ ಕರ್ನಾಟಕ ಸರಕಾರದ ನಾಡಕಚೇರಿ ತಂತ್ರಾಂಶ ಮೂಲಕ ಜಾತಿ, ಆದಾಯ, ನಿವಾಸಿ ಪ್ರಮಾಣ ಪತ್ರ ಪಡೆಯಬಹುದಾಗಿದೆ.
ಪ್ರಕ್ರಿಯೆ ಹೇಗೆ: ವೆಬ್‌ಪೇಜ್‌ನಲ್ಲಿ ಆನ್‌ಲೈನ್‌ ಕೊಂಡಿ ಕ್ಲಿಕಿಸಿ ಅಲ್ಲಿನ ಫಾರಂ ತುಂಬಬೇಕು. ಪ್ರಮಾಣ ಪತ್ರಕ್ಕಾಗಿ 15 ರೂ. ಶುಲ್ಕ ಡೆಬಿಟ್‌, ಕ್ರೆಡಿಟ್‌ ಕಾರ್ಡ್‌, ನೆಟ್‌ ಬ್ಯಾಂಕಿಂಗ್‌ ಮೂಲಕ ಪಾವತಿಸಿ ಪ್ರಮಾಣ ಪತ್ರ ಪಡೆಯಬಹುದು. ಸೈಬರ್‌ ಕೇಂದ್ರ ಸೇರಿ ಆನ್‌ಲೈನ್‌ ಸೇವೆ ಒದಗಿಸುವ ಸ್ಥಳದಲ್ಲಿ, ಜನರು ಪ್ರಮಾಣ ಪತ್ರ ಪಡೆಯಲು ಅವಕಾಶವಿದ್ದು ಸಾರ್ವಜನಿಕರಿಗೆ ಸಮಯ ಉಳಿತಾಯ ಆಗಲಿದೆ.
ಆನ್‌ಲೈನ್‌ ಪ್ರಮಾಣ ಪತ್ರ ಪಡೆಯುವಾಗ ರೇಷನ್‌ ಕಾರ್ಡ್‌, ಆಧಾರ ಸಂಖ್ಯೆ, ಜಿಲ್ಲೆ, ಗ್ರಾಮ, ವಾರ್ಡ್‌, ಹೆಸರು, ತಂದೆ/ಪೋಷಕರ ಹೆಸರು ನಮೂದಿಸಬೇಕು. ನೆಟ್‌ ಬ್ಯಾಂಕಿಂಗ್‌ 15 ರೂ. ಬ್ಯಾಂಕ ಕಮೀಷನ್‌ 4.90 ರೂ. ಸೇರಿ ಒಟ್ಟು 20ರೂ. ಪಾವತಿಸಬೇಕಿದೆ. ಜಾತಿ ಪ್ರಮಾಣ ಪತ್ರ ಜೀವಿತಾವಧಿಯಲ್ಲಿ ಒಮ್ಮೆ ಪಡೆದರೂ ಸಾಕು. ಆದಾಯ ಪ್ರಮಾಣ ಪತ್ರ ಪ್ರತಿ ಮೂರು ವರ್ಷಕೊಮ್ಮೆ ಪಡೆಯಬೇಕು ಎನ್ನುವ ಸೂಚನೆ ನೀಡಲಾಗಿದೆ.
ಜಾತಿ, ಆದಾಯ, ನಿವಾಸಿ ಪ್ರಮಾಣ ಪತ್ರಗಳನ್ನು ಆನ್‌ಲೈನ್‌ನಲ್ಲಿ ಪಡೆಯುವ ವ್ಯವಸ್ಥೆ ಜಾರಿಗೊಳಿಸಲಾಗಿದೆ, ಈಗಾಗಲೇ ಸರ್ವರ್‌ನಲ್ಲಿ ನಮೂದಿಸಿದ ವ್ಯಕ್ತಿಗಳ ಪ್ರಮಾನಪತ್ರ ಈಗ ಲಭ್ಯವಿದ್ದು ಮುಂದಿನ ದಿನಗಳಲ್ಲಿ ಎಲ್ಲರ ಡೆಟಾ ಅಪ್‌ಲೋಡ್‌ ಮಾಡಲಾಗುವುದು ಎನ್ನುತ್ತಾರೆ ಹೆಸರೆಳಲಿಚ್ಚಿಸದ ರಾಜ್ಯ ಮಟ್ಟದ ಕಂದಾಯ ಅಧಿಕಾರಿಗಳು.

‘ಆನ್‌ಲೈನ್‌ನಲ್ಲಿ ಪ್ರಮಾಣ ಪತ್ರ ಸಿಗುತ್ತಿರುವುದು ಖುಷಿ ವಿಚಾರ. ಹೊಸದಾಗಿ ಹೆಸರು ಸೇರ್ಪಡೆಗೊಳಿಸುವವರು ಉಪವಿಭಾಗಾಧಿಕಾರಿಗಳಿಗೆ ಮೇಲ್ಮನವಿ ಸಲ್ಲಿಸಬೇಕು ಎನ್ನುವ ನಿಯಮ ತಿದ್ದುಪಡಿ ಮಾಡಿ ತಹಶೀಲ್ದಾರ್‌ಗೆ ಅಧಿಕಾರ ನೀಡುವುದು ಅಗತ್ಯವಿದೆ’
-ಜಾನು ಲಮಾಣಿ, ತಾಪಂ ಮಾಜಿ ಅಧ್ಯಕ್ಷ

loading...