ರಾಜಕಾರಣಿಗಳಿಗೆ ಏಕೀಕರಣದ ಮಹತ್ವ ತಿಳಿದಿಲ್ಲ: ಅಡಿವೆಪ್ಪ

0
3
loading...

ಕನ್ನಡಮ್ಮ ಸುದ್ದಿ-ಹುಬ್ಬಳ್ಳಿ: ಅಖಂಡ ಕರ್ನಾಟಕ ಬಗ್ಗೆ ಪ್ರಶ್ನಿಸುವ, ಇಬ್ಭಾಗ ಮಾಡ ಹೊರಟಿರುವ, ಅಂತಹ ಮನಸ್ಥಿತಿಗೆ ನಾಡಿನ ಜನತೆಯನ್ನು ಸೆಳೆಯುತ್ತಿರುವ ನಾಟಕದ ರಾಜಕಾರಣಿಗಳಿಗೆ ನಾಡಿನ ಏಕೀಕರಣದ ಮಹತ್ವ ಏನು ತಿಳಿದಿದೆ. ಗೊಂದಲದ ವಾತಾವರಣ ಸೃಷ್ಠಿಸುತ್ತಿರುವ ರಾಜಕಾರಣಿಗಳಿಗೆ ಧಿಕ್ಕಾರ ಎಂದು ಆಶು ಕವಿ, ನವಲಗುಂದ ತಾಲೂಕು 6ನೇ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷ ಅಡಿವೆಪ್ಪ ಕಮತರ ಆಕ್ರೋಶ ವ್ಯಕ್ತಪಡಿಸಿದರು.
ಸ್ಥಳೀಯ ಗವಿಮಠದ ಆವರಣದಲ್ಲಿ ಜರುಗಿದ 6ನೇ ತಾಲೂಕು ಕನ್ನಡ ಸಾಹಿತ್ಯ ಸಮ್ಮೇಳನದ ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿದ ಅವರು, ಅದೆಷ್ಟೋ ಹೋರಾಟ ನಡೆದ ಪರಿಣಾಮ ಸಮಗ್ರ ಕನ್ನಡ ನಾಡು ಏಕೀಕರಣಗೊಂಡಿದ್ದು, ಕನ್ನಡಿಗರೆಲ್ಲರೂ ಒಂದಾಗಿ ಬಾಳುವುದರೊಂದಿಗೆ ನೆಲ, ಜಲ, ಭಾಷೆಗಾಗಿ ಸಮರ್ಪಣಾ ಮನೋಭಾವ ಮೈಗೂಡಿಸಿಕೊಳ್ಳಲಾಗಿದೆ. ಆದರೆ, ಪ್ರಸ್ತುತ ರಾಜಕೀಯ ಕಾರಣಕ್ಕೆ ಇಬ್ಭಾಗದ ಮಾತುಗಳು ಸಲ್ಲ. ಅಭಿವೃದ್ಧಿಗಾಗಿ ಹೋರಾಟ ಮಾಡಿ ಸಮಪಾಲು ಕೇಳುವುದರಲ್ಲೇನÀು ತಪ್ಪಿಲ್ಲ ಎಂದು ಅಭಿಪ್ರಾಯಪಟ್ಟರು.
ಸರಕಾರಿ ಶಾಲಾ, ಕಾಲೇಜುಗಳ ವಿದ್ಯಾರ್ಥಿಗಳಿಗೆ ಉಚಿತ ಬಸ್‌ ಪಾಸ್‌ ನೀಡುವ ರಾಜ್ಯ ಸರಕಾರದ ಕ್ರಮವನ್ನು ಸ್ವಾಗತಿಸಿದ ಅವರು, ಸರಕಾರಿ ಶಾಲೆಗಳಲ್ಲಿ ದಾಖಲಾತಿ ಹೆಚ್ಚಿಸುವ ನಿಟ್ಟಿನಲ್ಲಿ ರಾಜ್ಯ ಸರಕಾರ ದಿಟ್ಟ ಕ್ರಮಗಳನ್ನು ಅನುಸರಿಸಬೇಕು. ಕನ್ನಡ ಮಾಧ್ಯಮದಲ್ಲಿ ಕಲಿತವರಿಗೆ ಸರಕಾರಿ, ಖಾಸಗಿ ನೇಮಕಾತಿಗಳಲ್ಲಿ ಮೀಸಲಾತಿ ಕಡ್ಡಾಯಗೊಳಿಸಬೇಕು. ಎಲ್ಲ ಕಚೇರಿ, ಬ್ಯಾಂಕ್‌, ಸಹಕಾರಿ ಸಂಘಗಳಲ್ಲಿ ಕನ್ನಡದಲ್ಲಿಯೇ ಮಾತನಾಡುವಂತಾಗಬೇಕು ಎಂದು ಆಗ್ರಹಿಸಿದರು.
ಸಮ್ಮೇಳನ ಉದ್ಘಾಟಿಸಿದ ಕವಿ ಶಾಂತಿನಾಥ ದಿಬ್ಬದ ಮಾತನಾಡಿ, ಜನಪದವೇ ಗ್ರಾಮೀಣ ಭಾಗದ ಜೀವಾಳ. ಗ್ರಾಮೀಣ ಬದುಕಿನಲ್ಲೇ ಕನ್ನಡದ ಸೊಂಪು ಹೆಚ್ಚಾಗಿದೆ ಎಂದು ಅಭಿಪ್ರಾಯಪಟ್ಟರು.
ನಿಕಟಪೂರ್ವ ಅಧ್ಯಕ್ಷ ಅಮೃತೇಶ್‌ ತಂಡರ್‌ ಕನ್ನಡ ಧ್ವಜವನ್ನು ಸಮ್ಮೇಳನಾಧ್ಯಕ್ಷ ರಿಗೆ ಹಸ್ತಾಂತರಿಸಿದರು. ಅಧ್ಯಕ್ಷತೆ ವಹಿಸಿದ್ದ ಶಾಸಕ ಶಂಕರ ಮುನೇನಕೊಪ್ಪ ಮಾತನಾಡಿ, ತಾಲೂಕಿನ ಮಹನೀಯರ ನೆನಪಿಗಾಗಿ ಅಣ್ಣಿಗೇರಿಯಲ್ಲಿ ಪಂಪ ಸ್ಮಾರಕ ಭವನ, ಕೋಳವಾಡದಲ್ಲಿ ಕುಮಾರವ್ಯಾಸ ಸ್ಮಾರಕ ನಿರ್ಮಿಸಲಾಗಿದ್ದು, ಬರುವ ದಿನಗಳಲ್ಲಿ ಶ್ರೀಕಂಠ ಶಾಸ್ತ್ರೀ ಸ್ಮಾರಕ ನೀಡುವುದಾಗಿ ಭರವಸೆ ನೀಡಿದರಲ್ಲದೇ, ತಾಲೂಕಾ ಕಸಾಪ ಸ್ಥಾಪಿಸಲು ಉದ್ದೇಶಿಸಿರುವ ದತ್ತಿ ಉಪನ್ಯಾಸಕ್ಕಾಗಿ ತಮ್ಮ ತಂದೆ, ತಾಯಿ ಹೆಸರಿನಲ್ಲಿ 50 ಸಾವಿರ ರೂ. ದತ್ತಿ ನಿಧಿಯನ್ನು ನೀಡುವುದಾಗಿ ಹೇಳಿದರು. ಗವಿಮಠದ ಬಸವಲಿಂಗ ಸ್ವಾಮೀಜಿ, ಹಿರೇಮಠದ ಸಿದ್ದೇಶ್ವರ ಸ್ವಾಮೀಜಿ, ನಾಗಲಿಂಗಮಠದ ಸ್ವಾಮೀಜಿ ಸಾನ್ನಿಧ್ಯ ವಹಿಸಿದ್ದರು. ಸಾಹಿತಿ ಬಾಳಣ್ಣ ಶೀಗಿಹಳ್ಳಿ, ಜಿಲ್ಲಾ ಕಸಾಪ ಅಧ್ಯಕ್ಷ ಡಾ.ಲಿಂಗರಾಜ ಅಂಗಡಿ, ಜಿಪಂ ಸದಸ್ಯ ಅಂದಾನಯ್ಯ ಹಿರೇಮಠ, ಪುರಸಭೆ ಅಧ್ಯಕ್ಷೆ ಶಶಿರೇಖಾ ಸಿಡಗಂಟಿ,ಉಪಾಧ್ಯಕ್ಷೆ ನೀಲವ್ವ ಮುಪ್ಪಯ್ಯನವರ, ಯಲ್ಲಪ್ಪ ಮಾಡೊಳ್ಳಿ, ಮಂಜುನಾಥ ಜಾಧವ, ಬಿಇಒ ಅಶೋಕ ಭಜಂತ್ರಿ ಮತ್ತಿತರರು ಭಾಗಿಯಾಗಿದ್ದರು.

loading...