ಸಮಾಜದ ಅಪೇಕ್ಷೆಗೆ ತಕ್ಕಂತೆ ಮಾಧ್ಯಮ ಕ್ಷೇತ್ರ ಘನತೆ ಹೆಚ್ಚಿಸಿಕೊಳ್ಳಬೇಕು: ಶಾಸಕ ಹೆಗಡೆ

0
8
loading...

ಕನ್ನಡಮ್ಮ ಸುದ್ದಿ-ಶಿರಸಿ: ಸಮಾಜದ ಅಪೇಕ್ಷೆಗೆ ತಕ್ಕಂತೆ ಮಾಧ್ಯಮ ಕ್ಷೇತ್ರ ತನ್ನ ಘನತೆ ಹೆಚ್ಚಿಸಿಕೊಳ್ಳಬೇಕು ಎಂದು ಶಾಸಕ ವಿಶ್ವೇಶ್ವರ ಹೆಗಡೆ ಕಾಗೇರಿ ಹೇಳಿದರು.
ಉತ್ತರ ಕನ್ನಡ ಜಿಲ್ಲಾ ಕಾರ್ಯನಿರತ ಪತ್ರಕರ್ತರ ಸಂಘವು ಶಿರಸಿ ಜಿಲ್ಲಾ ಪತ್ರಿಕಾ ಭವನದಲ್ಲಿ ಆಯೋಜಿಸಿದ್ದ ರಾಧಾಕೃಷ್ಣ ಭಟ್ಟ ಭಟ್ಕಳ ದತ್ತಿನಿಧಿ ಉಪನ್ಯಾಸ ಕಾರ್ಯಕ್ರಮ ಉದ್ಘಾಟಿಸಿ ಅವರು ಮಾತನಾಡಿದರು. ಮಾಧ್ಯಮ ಕ್ಷೇತ್ರ ಸೂಕ್ಷ್ಮ ಸಂವೇದನೆ ಹೊಂದಿದ ಕ್ಷೇತ್ರವಾಗಿದೆ. ಸಮಾಜದ ಉಳಿದ ಕ್ಷೇತ್ರಗಳ ಪರಿಚಯ ಕೂಡ ಈ ಕ್ಷೇತ್ರದಿಂದ ಆಗಬೇಕಿದೆ. ಈ ನಿಟ್ಟಿನಲ್ಲಿ ಸಮಾಜ ಕೂಡ ಮಾಧ್ಯಮ ಕ್ಷೇತ್ರವನ್ನು ಸೂಕ್ಷ್ಮವಾಗಿ ಗಮನಿಸುತ್ತದೆ ಎಂಬುದನ್ನು ಪತ್ರಕರ್ತರು ಅರಿಯಬೇಕು. ಸಮಾಜ ಪರಿವರ್ತನೆಗೆ ಬೇಕಾದ ಪೂರಕ ಚಟುವಟಿಕೆ ಹಮ್ಮಿಕೊಳ್ಳಬೇಕು ಎಂದರು. ಪತ್ರಕರ್ತರು ಸಮಾಜದಲ್ಲಿ ತನ್ನದೇ ಆದ ಪ್ರಭಾವ ಬೆಳೆಸಿಕೊಳ್ಳಬೇಕು. ಹಾಗಾದಾಗ ಮಾಧ್ಯಮ ರಂಗಕ್ಕೂ ಅನುಕೂಲ ಎಂದು ಹೇಳಿದರು.

ದತ್ತಿನಿಧಿ ಉಪನ್ಯಾಸ ನೀಡಿದ ಹಿರಿಯ ಪತ್ರಕರ್ತ ಮೋಹನ ಹೆಗಡೆ, ಪತ್ರಕರ್ತರಲ್ಲಿ ಅಹಂ ಭಾವ ಬಂದರೆ ಸಮಾಜದಲ್ಲಿ ಅವಾಂತರ ಹೆಚ್ಚುತ್ತದೆ. ಹಾಗಾಗಿ ಮುಕ್ತವಾಗಿ ಆಲೋಚಿಸುವ ಜೊತೆಗೆ ನಿಷ್ಪಕ್ಷಪಾತ ಹಾಗೂ ನಿಸ್ಪ್ರಹವಾದ ಬರವಣಿಗೆಗೆ ಒಗ್ಗಿಕೊಳ್ಳಬೇಕು ಎಂದು ಹೇಳಿದರು. ಕ್ರಿಯಾಶೀಲ ಪತ್ರಿಕೋದ್ಯಮ ಇಂದಿನ ಅಗತ್ಯತೆ ಎಂದ ಅವರು, ಪತ್ರಕರ್ತರು ಈ ಕ್ಷೇತ್ರದ ಎಲ್ಲೆ ಮೀರದೆ, ಸಹಿಷ್ಣುತೆಯ ಮೇರೆ ದಾಟದೆ ಕಾರ್ಯ ನಿರ್ವಹಿಸಬೇಕು. ಪತ್ರಕರ್ತ ತನ್ನ ಕೆಲಸಕ್ಕೆ ಬದ್ಧನಾಗಿರಬೇಕು. ಹಾಗಾದಾಗ ಮಾತ್ರ ವರದಿಯ ತೂಕ ಇಮ್ಮಡಿಸುತ್ತದೆ ಎಂದರು.
ಮತ್ಸರ ಭಾವನೆ ಪತ್ರಕರ್ತರ ದ್ವೇಷಿಯಾಗಿದೆ. ಇಂಥ ಮನೋಭಾವ ಬೆಳೆದರೆ ಪತ್ರಕರ್ತರೂ ಬೆಳೆಯಲು ಸಾಧ್ಯವಿಲ್ಲ ಎಂದ ಅವರು, ಪತ್ರಿಕಾ ರಂಗ ಉದ್ಯಮ ಆದಂದಿನಿಂದ ಪತ್ರಿಕಾ ಸ್ವಾತಂತ್ರ್ಯದ ಕಸಿಯುವಿಕೆ ಆತಂಭವಾಗಿದೆ. ಸೇವೆ ಹಾಗೂ ಉದ್ಯಮದ ನಡುವೆ ಅತ್ಯುತ್ತಮ ಸಂಬಂಧವಿರಬೇಕು. ಮಾಧ್ಯಮಗಳು ಉದ್ಯಮವಾಗುವ ಜೊತೆಗೆ ಸೇವೆಗೂ ಆದ್ಯತೆ ನೀಡಬೇಕು. ಪತ್ರಕರ್ತರು ಆತ್ಮಾವಲೋಕನದ ಜೊತೆಗೆ ಸ್ವತಃ ಬೆಳೆಯಬೇಕು ಎಂದ ಅವರು, ಪತ್ರಿಕೆ ಕೊಂಡು ಓದುವವರ ಸಂಖ್ಯೆ ಕಡಿಮೆಯಿದೆ. ಪತ್ರಿಕೆ ಜನರವರೆಗೆ ತಲುಪಿಸುವ ವ್ಯವಸ್ಥೆಯ ಕೊರತೆಯಿದೆ. ಸಾಮಾಜಿಕ ಜಾಲತಾಣಗಳು ಮಾಧ್ಯಮಗಳಿಗೆ ಸವಾಲಾಗುತ್ತಿವೆ. ಮಾಧ್ಯಮರಂಗ ಜಾಗತಿಕವಾಗಿ ವಿಸ್ತರಿಸಿಕೊಂಡಾಗ ಇಂಥ ಹಲವು ಸಮಸ್ಯೆಗೆ ತಲೆ ಕೊಡಬೇಕು. ಈ ಎಲ್ಲ ಸವಾಲಿನ ನಡುವೆಯೂ ಪತ್ರಕರ್ತರು, ಪತ್ರಿಕೆ, ಮಾಧ್ಯಮಗಳು ಇಲ್ಲದಿದ್ದರೆ ಸಮಾಜ ಹಿಮ್ಮುಖ ಚಲನೆ ಮಾಡುತ್ತಿತ್ತು ಎಂಬ ಹಿರಿಮೆ ನಮ್ಮದಾಗಿದೆ ಎಂದರು. ಪತ್ರಕರ್ತರಿಗೆ ಉತ್ತರ ಕನ್ನಡ ಸಮೃದ್ಧ ಕ್ಷೇತ್ರವಾಗಿದೆ. ಇಲ್ಲಿನ ಪತ್ರಕರ್ತರು ಹೊಸ ವಿಷಯಕ್ಕಾಗಿ ತುಡಿಯುತ್ತಾರೆ. ರಾಜ್ಯದಲ್ಲಿ ಮೈಸೂರು ಹೊರತುಪಡಿಸಿ ಉತ್ತರ ಕನ್ನಡ ಸಂಘ ಕ್ರಿಯಾಶೀಲವಾಗಿ ಕಾರ್ಯನಿರ್ವಹಿಸುತ್ತಿದೆ. ಜಿಲ್ಲೆಯ ಪತ್ರಕರ್ತರ ಅಸ್ಮಿತೆ ಉಳಿಯಲು ಈ ನೆಲದ ವಿಶೇಷತೆಯೇ ಕಾರಣವಾಗಿದೆ ಎಂದು ಹೇಳಿದರು.

ಈ ವೇಳೆ ಜಿಲ್ಲಾ ಸಮಿತಿಯ ನೂತನ ಪದಾಧಿಕಾರಿಗಳ ಪದಗ್ರಹಣ ಕಾರ್ಯಕ್ರಮ ನೆರವೇರಿತು. ನೂತನ ಜಿಲ್ಲಾಧ್ಯಕ್ಷ ರಾಧಾಕೃಷ್ಣ ಭಟ್ಟ, ನಿಕಟಪೂರ್ವ ಅಧ್ಯಕ್ಷ ಜಿ.ಸುಬ್ರಾಯ ಭಟ್ಟ, ಉಪಾಧ್ಯಕ್ಷ ಅನಂತ ದೇಸಾಯಿ ಇದ್ದರು. ಪ್ರಧಾನ ಕಾರ್ಯದರ್ಶಿ ನರಸಿಂಹ ಅಡಿ ನಿರೂಪಿಸಿದರು. ಖಜಾಂಚಿ ಸುಮಂಗಲಾ ಹೊನ್ನೆಕೊಪ್ಪ ವಂದಿಸಿದರು.

loading...