ಅಯ್ಯರ್, ಪಂತ್ ಹೋರಾಟ ವ್ಯರ್ಥ: ಭಾರತಕ್ಕೆ 8 ವಿಕೆಟ್ ಗಳ ಸೋಲು

0
21

ಚೆನ್ನೈ: ವೆಸ್ಟ್ ಇಂಡೀಸ್ ತಂಡದ ವಿರುದ್ಧದ ಟಿ20 ಸರಣಿಯನ್ನು 2-1 ಅಂತರದಿಂದ ಗೆದ್ದು ಬೀಗಿದ್ದ ಟೀಂ ಇಂಡಿಯಾಗೆ ಪ್ರಥಮ ಏಕದಿನ ಪಂದ್ಯದಲ್ಲಿ ಸೋಲಿನ ಬಿಸಿ ಮುಟ್ಟಿದೆ. ಭಾರತ ನೀಡಿದ 288 ರನ್ ಸವಾಲನ್ನು ಆತ್ಮವಿಶ್ವಾಸದಿಂದಲೇ ಬೆನ್ನಟ್ಟಿದ ಪೊಲಾರ್ಡ್ ಪಡೆ 08 ವಿಕೆಟ್ ಗಳ ಅಧಿಕಾರಯುತ ಜಯವನ್ನು ತನ್ನದಾಗಿಸಿಕೊಂಡಿತು.
ಆರಂಭಿಕ ಆಟಗಾರ ಶೈ ಹೋಪ್ ಅವರ ತಾಳ್ಮೆಯ ಶತಕ ಮತ್ತು ಒನ್ ಡೌನ್ ಬ್ಯಾಟ್ಸ್ ಮನ್ ಶಿಮ್ರನ್ ಹೈಟ್ ಮೇರ್ ಅವರ ಭರ್ಜರಿ ಶತಕ ಮತ್ತು ಎರಡನೇ ವಿಕೆಟಿಗೆ ಈ ಜೋಡಿ ನೀಡಿದ 218 ರನ್ ಗಳ ಭರ್ಜರಿ ಜೊತೆಯಾಟ ಪ್ರವಾಸಿಗರಿಗೆ ಚಿಪಾಕ್ ಅಂಗಳದಲ್ಲಿ ಭರ್ಜರಿ ಗೆಲುವನ್ನು ತಂದುಕೊಡುವಲ್ಲಿ ನೆರವಾಯಿತು.
ವೆಸ್ಟ್ ಇಂಡೀಸ್ ಗೆ ಆರಂಭಿಕ ಹೊಡೆತ ನೀಡುವಲ್ಲಿ ಭಾರತೀಯ ಬೌಲರ್ ಗಳು ಯಶಕಂಡರು. ಓಪನರ್ ಸುನೀಲ್ ಆ್ಯಂಬ್ರಿಸ್ (09) ಅವರನ್ನು ಚಾಹರ್ ಎಲ್.ಬಿ. ಬಲೆಗೆ ಕೆಡವಿದರು. ಆದರೆ ಆ ಬಳಿಕ ಜೊತೆಯಾದ ಹೋಪ್ (ಅಜೇಯ 102) ಮತ್ತು ಹೆಟ್ ಮೈರ್ (139) ಜೋಡಿ ಭಾರತೀಯ ಬೌಲರ್ ಗಳಿಗೆ ಮತ್ಯಾವುದೇ ಮೇಲುಗೈ ದೊರೆಯದಂತೆ ನೋಡಿಕೊಂಡರು.
ವಿಕೆಟ್ ಕೀಪರ್ ಶೈ ಹೋಪ್ ನಿಧಾನಗತಿಯ ಆಟಕ್ಕೆ ತೊಡಗಿದರೆ ಹೇಟ್ ಮೇರ್ ಭಾರತೀಯ ಬೌಲರ್ ಗಳನ್ನು ಮುಲಾಜಿಲ್ಲದೇ ದಂಡಿಸುತ್ತಾ ಹೋದರು. ಈ ಪರ್ಫೆಕ್ಟ್ ಕಾಂಬಿನೇಷನ್ ಮುರಿಯುವ ಕ್ಯಾಪ್ಟನ್ ಕೊಹ್ಲಿಯ ಯಾವ ತಂತ್ರವೂ ಫಲನೀಡಲಿಲ್ಲ. ಹೆಟ್ ಮೈರ್ ಕೇವಲ 106 ಎಸೆತಗಳಲ್ಲಿ 139 ರನ್ ಬಾರಿಸಿದರು. ಇದರಲ್ಲಿ 11 ಬೌಂಡರಿ ಹಾಗೂ 07 ಭರ್ಜರಿ ಸಿಕ್ಸರ್ ಗಳು ಒಳಗೊಂಡಿತ್ತು.
ಅಯ್ಯರ್, ಪಂತ್ ಹೋರಾಟ

ಟಾಸ್ ಸೋತು ಬ್ಯಾಟಿಂಗ್ ಗೆ ಇಳಿಸಲ್ಪಟ್ಟ ಭಾರತ ತಂಡಕ್ಕೆ ಯುವ ಬ್ಯಾಟ್ಸ್ ಮನ್ ಗಳಾದ ಶ್ರೇಯಸ್ ಅಯ್ಯರ್ (70), ವಿಕೆಟ್ ಕೀಪರ್ ರಿಷಭ್ ಪಂತ್ (71) ಮತ್ತು ಕೇಧಾರ್ ಜಾಧವ್ (40) ಅವರು ಆಸರೆಯಾದರು. ಇವರ ಜವಾಬ್ದಾರಿಯುತ ಬ್ಯಾಟಿಂಗ್ ನೆರವಿನಿಂದ ಭಾರತ ನಿಗದಿತ 50 ಓವರುಗಳಲ್ಲಿ 07 ವಿಕೆಟ್ ಗಳ ನಷ್ಟಕ್ಕೆ 287 ರನ್ ಗಳನ್ನು ಕಲೆಹಾಕಿತು.
ಭಾರತದ ಆರಂಭ ನಿರಾಶಾದಾಯಕವಾಗಿತ್ತು. ತಂಡದ ಮೊತ್ತ ಕೇವಲ 21 ರನ್ ಗಳಾಗುವಷ್ಟರಲ್ಲಿ ಕೆ.ಎಲ್. ರಾಹುಲ್ (06) ಅವರು ಕಾಟ್ರೆಲ್ ಬೌಲಿಂಗ್ ನಲ್ಲಿ ಔಟಾದರು. ಇದರ ಬೆನ್ನಲ್ಲೇ ಕೇವಲ ನಾಲ್ಕು ರನ್ ಗಳಿಸಿ ವಿರಾಟ್ ಕೊಹ್ಲಿ ಕೂಡಾ ಪೆವಿಲಿಯನ್ ಸೇರಿದ್ದು ಟೀಂ ಇಂಡಿಯಾದ ಬ್ಯಾಟಿಂಗ್ ಸಂಕಟವನ್ನು ಹೆಚ್ಚಿಸಿತು. ಆದರೆ ಈ ಹಂತದಲ್ಲಿ ಆರಂಭಿಕ ಆಟಗಾರ ರೋಹಿತ್ ಶರ್ಮಾ (36) ಅವರಿಗೆ ಜೊತೆಯಾದ ಶ್ರೇಯಸ್ ಅಯ್ಯರ್ (70) ಎಚ್ಚರಿಕೆಯ ಆಟಕ್ಕೆ ತೊಡಗಿದರು. ಈ ಜೋಡಿ ಮೂರನೇ ವಿಕೆಟಿಗೆ ಅಮೂಲ್ಯ 55 ರನ್ ಗಳ ಜೊತೆಯಾಟ ನೀಡಿದರು. ಈ ಹಂತದಲ್ಲಿ 36 ರನ್ ಗಳಿಸಿದ್ದ ಶರ್ಮಾ ಜೋಸೆಫ್ ಬೌಲಿಂಗ್ ನಲ್ಲಿ ಔಟಾದರು.
ನಾಲ್ಕನೇ ವಿಕೆಟಿಗೆ ಬ್ಯಾಟ್ ಹಿಡಿದು ಬಂದ ವಿಕೆಟ್ ಕೀಪರ್ ರಿಷಭ್ ಪಂತ್ ಅವರು ಅಯ್ಯರ್ ಜೊತೆ ಸೇರಿಕೊಂಡು ತಂಡದ ಮೊತ್ತವನ್ನು ಹೆಚ್ಚಿಸುತ್ತಾ ಸಾಗಿದರು. ವೆಸ್ಟ್ ಇಂಡೀಸ್ ಬೌಲರ್ ಗಳನ್ನು ದಿಟ್ಟವಾಗಿ ಎದುರಿಸಿದ ಈ ಯುವ ಜೋಡಿ ನಾಲ್ಕನೇ ವಿಕೆಟಿಗೆ ಅತ್ಯಮೂಲ್ಯ 114 ರನ್ ಭಾಗೀದಾರಿಕೆ ನೀಡಿದರು. ವೇಗದ ಆಟವಾಡಿದ ಪಂತ್ 69 ಎಸೆತೆಗಳಲ್ಲಿ 01 ಸಿಕ್ಸರ್ ಹಾಗೂ 07 ಬೌಂಡರಿ ನೆರವಿನಿಂದ 71 ರನ್ ಬಾರಿಸಿದರೆ ಶ್ರೇಯಸ್ ಅಯ್ಯರ್ ಅವರು 88 ಎಸೆತೆಗಳಲ್ಲಿ 70 ರನ್ ಬಾರಿಸಿದರು. ಇದರಲ್ಲಿ 05 ಬೌಂಡರಿ ಹಾಗೂ 01 ಸಿಕ್ಸರ್ ಒಳಗೊಂಡಿತ್ತು.
ಶ್ರೇಯಸ್ ಐಯರ್ ವಿಕೆಟ್ ಬಿದ್ದ ಮೇಲೆ ಕ್ರೀಸಿಗೆ ಆಗಮಿಸಿದ ಇನ್ನೋರ್ವ ಯುವ ಬ್ಯಾಟ್ಸ್ ಮನ್ ಕೇದಾರ್ ಜಾಧವ್ (40) ಅವರು ಸ್ಲ್ಯಾಗ್ ಓವರ್ ನಲ್ಲಿ ಸಿಡಿದು ನಿಂತರು. ಅನುಭವಿ ರವೀಂದ್ರ ಜಡೇಜಾ (21) ಅವರೊಂದಿಗೆ ಸೇರಿಕೊಂಡು 59 ರನ್ ಗಳ ಜೊತೆಯಾಟ ನೀಡಿದರು. ಈ ಜೋಡಿ ಕ್ರೀಸಿನಲ್ಲಿರುವವರೆಗೆ ಭಾರತ 300ರ ಗಡಿ ದಾಟಬಹುದೆಂಬ ನಿರೀಕ್ಷೆ ಇತ್ತು. ಆದರೆ ಜಾಧವ್ ಹಾಗೂ ಜಡೇಜಾ ಒಟ್ಟಿಗೇ ಔಟಾಗುವುದರೊಂದಿಗೆ ಈ ನಿರೀಕ್ಷೆ ಹುಸಿಯಾಯಿತು.
ಶಿಸ್ತಿನ ಬೌಲಿಂಗ್ ಮತ್ತು ಫೀಲ್ಡಿಂಗ್ ಸಂಘಟಿಸಿದ ವೆಸ್ಟ್ ಇಂಡೀಸ್ ಭಾರತದ ಘಟಾನುಘಟಿ ಬ್ಯಾಟ್ಸ್ ಮನ್ ಗಳನ್ನು ಕಟ್ಟಿ ಹಾಕುವಲ್ಲಿ ಯಶಸ್ವಿಯಾಯಿತು. ಭಾರತವನ್ನು ಕಡಿಮೆ ಮೊತ್ತಕ್ಕೆ ಕಟ್ಟಿ ಹಾಕುವ ಕೆರಿಬಿಯನ್ನರ ಪ್ರಯತ್ನಕ್ಕೆ ಅಡ್ಡಗಾಲಾಗಿದ್ದು ಅಯ್ಯರ್ ಮತ್ತು ಪಂತ್ ಜವಾಬ್ದಾರಿಯುತ ಜೊತೆಯಾಟ.

ಉತ್ತಮ ಬೌಲಿಂಗ್ ದಾಳಿ ಸಂಘಟಿಸಿದ ಶೆಲ್ಡ್ರನ್ ಕಾಟ್ರೆಲ್ 10 ಓವರ್ ಗೆ 46 ರನ್ ನೀಡಿ 2 ವಿಕೆಟ್ ಪಡೆದರು. ಇದರಲ್ಲಿ 3 ಮೇಡೆನ್ ಓವರ್ ಇದ್ದಿದ್ದೂ ವಿಶೆಷ. ಇನ್ನುಳಿದಂತೆ ಕೀಮೋ ಪೌಲ್ ಮತ್ತು ಅಲ್ಜಾರಿ ಜೋಸೆಫ್ ತಲಾ 02 ವಿಕೆಟ್ ಪಡೆದರೆ ಕೈರೆನ್ ಪೊಲಾರ್ಡ್ 01 ವಿಕೆಟ್ ಪಡೆದರು.

loading...