ಮೊದಲ ಪಂದ್ಯದ ಗೆಲುವಿನ ಶ್ರೇಯವನ್ನು ಯಜ್ವೇಂದ್ರ ಚಹಲ್‌ಗೆ ಅರ್ಪಿಸಿದ ಕೊಹ್ಲಿ

0
8

ನವದೆಹಲಿ:- ಹದಿಮೂರನೇ ಆವೃತ್ತಿಯ ಇಂಡಿಯನ್‌ ಪ್ರೀಮಿಯರ್‌ ಲೀಗ್‌ನ ಸನ್‌ರೈಸರ್ಸ್ ಹೈದರಾಬಾದ್‌ ವಿರುದ್ಧದ ಮೊದಲನೇ ಪಂದ್ಯದ ಗೆಲುವಿನ ಶ್ರೇಯವನ್ನು ಲೆಗ್‌ ಸ್ಪಿನ್ನರ್‌ ಯಜ್ವೇಂದ್ರ ಚಹಲ್‌ಗೆ ಆರ್‌ಸಿಬಿ ನಾಯಕ ವಿರಾಟ್‌ ಕೊಹ್ಲಿ ಅರ್ಪಿಸಿದರು.

ದುಬೈ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಕ್ರೀಡಾಂಗಣದಲ್ಲಿ ಯಜ್ವೇಂದ್ರ ಚಹಲ್ ಮಾಡಿದ ಸ್ಪಿನ್‌ ಮೋಡಿಯ ನೆರವಿನಿಂದ ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು 10 ರನ್‌ಗಳಿಂದ ಸನ್‌ ರೈಸರ್ಸ್ ಹೈದರಾಬಾದ್‌ ತಂಡವನ್ನು ಮಣಿಸಿತು. ಆ ಮೂಲಕ 2020ರ ಐಪಿಎಲ್‌ ಟೂರ್ನಿಯ ಅಭಿಯಾನವನ್ನು ಕೊಹ್ಲಿ ಶುಭಾರಂಭ ಮಾಡಿತು.

164 ರನ್‌ಗಳ ಗುರಿ ಹಿಂಬಾಲಿಸಿದ್ದ ಸನ್‌ ರೈಸರ್ಸ್‌ ಹೈದರಾಬಾದ್‌ಗೆ ಆರಂಭದಲ್ಲಿಯೇ ನಾಯಕ ಡೇವಿಡ್‌ ವಾರ್ನರ್‌ ರನೌಟ್‌ ಆಗಿದ್ದರು. ಆದರೆ, ಜಾನಿ ಬೈರ್‌ಸ್ಟೋವ್‌ ಹಾಗೂ ಮನೀಶ್‌ ಪಾಂಡೆ ಅತ್ಯುತ್ತಮ ಜತೆಯಾಟವಾಡಿದ್ದರು. ಒಂದು ಹಂತದಲ್ಲಿ ಸನ್‌ ರೈಸರ್ಸ್‌ ಹೈದರಾಬಾದ್‌ 2 ವಿಕೆಟ್‌ಗಳ ನಷ್ಟಕ್ಕೆ 121 ರನ್‌ಗಳಿಸಿ ಸುಭದ್ರ ಸ್ಥಿತಯಲ್ಲಿತ್ತು. ಆದರೆ, 16ನೇ ಓವರ್‌ನಲ್ಲಿ ಜಾನಿ ಬೈರ್‌ಸ್ಟೋವ್‌, ಯಜ್ವೇಂದ್ರ ಚಹಲ್‌ಗೆ ಕ್ಲೀನ್‌ ಬೌಲ್ಡ್ ಆದರು.

ನಂತರ ಕ್ರೀಸ್‌ಗೆ ಬಂದ ವಿಜಯ್‌ ಶಂಕರ್‌ ಆಡಿದ ಮೊದಲನೇ ಎಸೆತದಲ್ಲಿಯೇ ಚಹಲ್‌ ಗೂಗ್ಲಿಯನ್ನು ಅರಿಯುವಲ್ಲಿ ವಿಫಲವಾಗಿ ಕ್ಲೀನ್‌ ಬೌಲ್ಡ್ ಆದರು. ಇದು ಪಂದ್ಯದ ತಿರುವನ್ನೇ ಬದಲಾಯಿಸಿತು. ನಂತರ 32 ರನನ್‌ಗಳ ಒಳಗಾಗಿ ಇನ್ನುಳಿದ ಎಂಟು ವಿಕೆಟ್‌ಗಳು ಉರುಳಿದವು. ಅಂತಿಮವಾಗಿ ಹೈದರಾಬಾದ್‌ ಫ್ರಾಂಚೈಸಿ 153 ರನ್‌ಗಳಿಗೆ ಆಲೌಟ್‌ ಆಯಿತು.

ಯಜ್ವೇಂದ್ರ ಚಹಲ್ ತಮ್ಮ ನಾಲ್ಕು ಓವರ್‌ಗಳ ಸ್ಪೆಲ್‌ನಲ್ಲಿ ನೀಡಿದ್ದು ಒಂದೇ ಒಂದು ಬೌಂಡರಿ. ಒಟ್ಟಾರೆ ಅವರು 18 ರನ್‌ ನೀಡಿ ಮೂರು ವಿಕೆಟ್‌ಗಳನ್ನು ಕಬಳಿಸಿದರು. ಆಮೂಲಕ ಪಂದ್ಯ ಶ್ರೇಷ್ಠ ಪ್ರಶಸ್ತಿಗೆ ಭಾಜನರಾದರು.

ಪಂದ್ಯದ ಬಳಿಕ ಮಾತನಾಡಿದ ವಿರಾಟ್‌ ಕೊಹ್ಲಿ, ಪಂದ್ಯದ ಗೆಲುವಿನ ಶ್ರೇಯವನ್ನು ಯಜ್ವೇಂದ್ರ ಚಹಲ್‌ಗೆ ನೀಡಿದರು. ಅಲ್ಲದೆ, ಅರ್ಧಶತಕ ಸಿಡಿಸಿದ ದೇವದತ್‌ ಪಡಿಕ್ಕಲ್‌, ಎಬಿ ಡಿವಿಲಿಯರ್ಸ್ ಹಾಗೂ ಶಿವಂ ದುಬೆ ಅವರ ಪ್ರದರ್ಶನವನ್ನು ಆರ್‌ಸಿಬಿ ನಾಯಕ ಶ್ಲಾಘಿಸಿದರು.

“ಇದು ಅದ್ಭುತವಾಗಿತ್ತು ಹಾಗೂ ಕಳೆದ ವರ್ಷ ಈ ಫಲಿತಾಂಶ ಅವರ ಕಡೆಯಿತ್ತು. ನಾವು ಇಂದು(ಸೋಮವಾರ) ರಾತ್ರಿ ಹಿಡಿತವನ್ನು ಹೊಂದಿದ್ದೆವು. ಯುವಿ ಬಂದು ಪಂದ್ಯವನ್ನು ನಮ್ಮ ಪರವಾಗಿ ಬದಲಾಯಿಸಿದರು. ಯಾವುದೇ ವಿಕೆಟ್‌ ಪಡೆಯುವ ಕೌಶಲ ನನ್ನ ಬಳಿ ಎಂಬುದನ್ನು ಅವರು ಸಾಬೀತು ಪಡಿಸಿದರು. ಅವರು ಬಂದ ಹಾದಿ ಹಾಗೂ ಅವರ ಆಕ್ರಮಣಕಾರಿ ಲೈನ್‌ನಲ್ಲಿ ಬೌಲಿಂಗ್‌ ಮಾಡಿದರು. ನನ್ನ ಪ್ರಕಾರನ ಪಂದ್ಯದ ದಿಕ್ಕು ಬದಲಾವಣೆ ಮಾಡಿದ್ದು ಚಹಲ್,” ಎಂದು ವಿರಾಟ್‌ ಕೊಹ್ಲಿ ಹೇಳಿದರು.

“ನಾವು ಅತ್ಯುತ್ತಮ ಆರಂಭವನ್ನು ಪಡೆದಿದ್ದೇವೆ ಹಾಗೂ ದೇವದತ್‌ ಪಡಿಕ್ಕಲ್‌ ಬ್ಯಾಟಿಂಗ್‌ ಅದ್ಭುತವಾಗಿತ್ತು ಆರೋನ್‌ ಫಿಂಚ್‌ ಕೂಡ ಚೆನ್ನಾಗಿ ಆಡಿದರು. ಕೊನೆಯ ಮೂರು ಓವರ್‌ಗಳಲ್ಲಿ ಎಬಿಡಿ ಬ್ಯಾಟಿಂಗ್‌ನಿಂದಾಗಿ ನಾವು 160 ರನ್‌ ಮೇಲೆ ಗಳಿಸಲು ಸಾಧ್ಯವಾಯಿತು. ನಾನು ಹೇಳಿದ್ದೇನೆಂದರೆ, ಬೌಲಿಂಗ್ ಗುಂಪಿನಲ್ಲಿ ನಕಾರಾತ್ಮಕತೆಯನ್ನು ಜಾರಿಗೊಳಿಸಲು ನಾವು ಬಿಡಲಿಲ್ಲ ಎಂಬುದು ಒಂದು ದೊಡ್ಡ ಸಂಕೇತವಾಗಿದೆ. ಶಿವಂ ದುಬೆಯ ಆ ಮೂರು ಓವರ್‌ಗಳ ಬೌಲಿಂಗ್ ಮಾಡುವುದನ್ನು ನೋಡಲು ನಿಜವಾಗಿಯೂ ಅತ್ಯುತ್ತಮವಾಗಿತ್ತು,” ಎಂದು ಅವರು ಹೇಳಿದರು.

loading...