ಯಜ್ವೇಂದ್ರ ಚಹಲ್‌ ಕೊನೆಯ ಓವರ್‌ ಪಂದ್ಯಕ್ಕೆ ಟರ್ನಿಂಗ್‌ ಪಾಯಿಂಟ್‌: ಡೇವಿಡ್‌ ವಾರ್ನರ್‌

0
6

ನವದೆಹಲಿ:-ಸೋಮವಾರ ರಾಯಲ್‌ ಚಾಲೆಂಜರ್ಸ್ ಬೆಂಗಳೂರು ವಿರುದ್ದ ಸೋಲಿಗೆ ಯಜ್ವೇಂದ್ರ ಚಹಲ್‌ ಅವರ ಕೊನೆಯ ಓವರ್‌ ಟರ್ನಿಂಗ್‌ ಪಾಯಿಂಟ್‌ ಎಂದು ಸನ್‌ ರೈಸರ್ಸ್ ಹೈದರಾಬಾದ್‌ ತಂಡದ ನಾಯಕ ಡೇವಿಡ್‌ ವಾರ್ನರ್ ಹೇಳಿದ್ದಾರೆ.

ದುಬೈ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಕ್ರೀಡಾಂಗಣದಲ್ಲಿ ಸನ್‌ ರೈಸರ್ಸ್ ಹೈದರಾಬಾದ್‌ ತಂಡ, ಆರ್‌ಸಿಬಿ ವಿರುದ್ಧ 10 ರನ್‌ಗಳ ಸೋಲಿನೊಂದಿಗೆ ಹದಿಮೂರನೇ ಆವೃತ್ತಿಯ ಐಪಿಎಲ್‌ ಟೂರ್ನಿ ಆರಂಭಿಸಿದೆ.

164 ರನ್‌ಗಳ ಗುರಿ ಹಿಂಬಾಲಿಸಿದ್ದ ಸನ್‌ ರೈಸರ್ಸ್‌ ಹೈದರಾಬಾದ್‌ಗೆ ಆರಂಭದಲ್ಲಿಯೇ ನಾಯಕ ಡೇವಿಡ್‌ ವಾರ್ನರ್‌ ರನೌಟ್‌ ಆಗಿದ್ದರು. ಆದರೆ, ಜಾನಿ ಬೈರ್‌ಸ್ಟೋವ್‌ ಹಾಗೂ ಮನೀಶ್‌ ಪಾಂಡೆ ಅತ್ಯುತ್ತಮ ಜತೆಯಾಟವಾಡಿದ್ದರು. ಒಂದು ಹಂತದಲ್ಲಿ ಸನ್‌ ರೈಸರ್ಸ್‌ ಹೈದರಾಬಾದ್‌ 2 ವಿಕೆಟ್‌ಗಳ ನಷ್ಟಕ್ಕೆ 121 ರನ್‌ಗಳಿಸಿ ಸುಭದ್ರ ಸ್ಥಿತಯಲ್ಲಿತ್ತು. ಆದರೆ, 16ನೇ ಓವರ್‌ನಲ್ಲಿ ಜಾನಿ ಬೈರ್‌ಸ್ಟೋವ್‌, ಯಜ್ವೇಂದ್ರ ಚಹಲ್‌ಗೆ ಕ್ಲೀನ್‌ ಬೌಲ್ಡ್ ಆದರು.

ನಂತರ ಕ್ರೀಸ್‌ಗೆ ಬಂದ ವಿಜಯ್‌ ಶಂಕರ್‌ ಆಡಿದ ಮೊದಲನೇ ಎಸೆತದಲ್ಲಿಯೇ ಚಹಲ್‌ ಗೂಗ್ಲಿಯನ್ನು ಅರಿಯುವಲ್ಲಿ ವಿಫಲವಾಗಿ ಕ್ಲೀನ್‌ ಬೌಲ್ಡ್ ಆದರು. ಇದು ಪಂದ್ಯದ ತಿರುವನ್ನೇ ಬದಲಾಯಿಸಿತು. ನಂತರ 32 ರನನ್‌ಗಳ ಒಳಗಾಗಿ ಇನ್ನುಳಿದ ಎಂಟು ವಿಕೆಟ್‌ಗಳು ಉರುಳಿದವು. ಅಂತಿಮವಾಗಿ ಹೈದರಾಬಾದ್‌ ಫ್ರಾಂಚೈಸಿ 153 ರನ್‌ಗಳಿಗೆ ಆಲೌಟ್‌ ಆಯಿತು.

61 ರನ್‌ಗಳನ್ನು ಗಳಿಸಿದ ಜಾನಿ ಬೈರ್‌ಸ್ಟೋವ್‌ ಸನ್‌ ರೈಸರ್ಸ್ ಹೈದರಾಬಾದ್‌ ಪರ ಗರಿಷ್ಠ ಸ್ಕೋರರ್‌ ಆದರು. ಇನ್ನು, ಕರ್ನಾಟಕದ ಬ್ಯಾಟ್ಸ್‌ಮನ್‌ 34 ರನ್‌ ಗಳಿಸಿದರು. ಇನ್ನುಳಿದ ಬ್ಯಾಟ್ಸ್‌ಮನ್‌ಗಳು ಎರಡಂಕಿ ವೈಯಕ್ತಿಕ ಮೊತ್ತ ಕಲೆಹಾಕುವಲ್ಲಿ ವಿಫಲರಾದರು.

ಪಂದ್ಯದ ಬಳಿಕ ಮಾತನಾಡಿದ ಸನ್‌ ರೈಸರ್ಸ್ ಹೈದರಾಬಾದ್‌ ನಾಯಕ ಡೇವಿಡ್‌ ವಾರ್ನರ್‌, ಆರ್‌ಸಿಬಿ ಸ್ಪಿನ್ನರ್‌ ಯಜ್ವೇಂದ್ರ ಚಹಲ್‌ ಪಂದ್ಯದ ದಿಕ್ಕನ್ನು ಬದಲಾಯಿಸಿದರು ಎಂದು ಹೇಳಿದರು. ಇದೇ ಸಮಯದಲ್ಲಿ, ಎಸ್‌ಆರ್‌ಎಚ್ ತ್ವರಿತವಾಗಿ ಮುಂದುವರಿಯುವ ಅವಶ್ಯಕತೆಯಿದೆ ಎಂದು ಅವರು ಉಲ್ಲೇಖಿಸಿದರು ಮತ್ತು ಕ್ಯಾಂಪ್‌ನ ಯುವ ಆಟಗಾರರು ಹೇಗೆ ಪ್ರದರ್ಶನ ನೀಡುತ್ತಾರೆ ಎಂಬುದರ ಬಗ್ಗೆ ತಮ್ಮ ಉತ್ಸಾಹವನ್ನು ವ್ಯಕ್ತಪಡಿಸಿದರು.

“ರನ್‌ ಚೇಸ್‌ ಮಾಡುತ್ತಿದ್ದ ನಾವು ಪಂದ್ಯದ ಮೇಲೆ ನಿಯಂತ್ರಣ ಸಾಧಿಸಿದ್ದೆವು. ಬೌಲರ್‌ಗಳ ಕೊನೆಯ ಓವರ್‌ಗಳಲ್ಲಿ ಹೊಡೆಯುವ ಬಗ್ಗೆ ಯೋಜನೆ ರೂಪಿಸಲಾಗಿತ್ತು. ಆದರೆ, ಯಜ್ವೇಂದ್ರ ಚಹಲ್‌ ತಮ್ಮ ಕೊನೆಯ ಓವರ್‌ನಲ್ಲಿ ಸತತವಾಗಿ ಎರಡು ವಿಕೆಟ್‌ಗಳನ್ನು ಪಡೆಯುವ ಮೂಲಕ ಪಂದ್ಯದ ದಿಕ್ಕನ್ನು ಬದಲಾಯಿಸಿದರು,” ಎಂದು ಡೇವಿಡ್‌ ವಾರ್ನರ್‌ ಹೇಳಿದರು.

“ನಾವು ಮತ್ತೆ ಡ್ರಾಯಿಂಗ್ ಬೋರ್ಡ್‌ಗೆ ಹೋಗಬೇಕಾಗಿದೆ. ಸೋಮವಾರದ ಪಂದ್ಯದ ಬಗ್ಗೆ ಏನೂ ಮಾಡಲು ಸಾಧ್ಯವಿಲ್ಲ. ಆದರೆ ಅಬು ಧಾಬಿಯಲ್ಲಿನ ನಮ್ಮ ಮುಂದಿನ ಪಂದ್ಯದ ಒಳಗಾಗಿ ಇನ್ನಷ್ಟು ಕಠಿಣ ಪರಿಶ್ರಮ ಪಡಬೇಕಾಗಿದೆ. ಮುಂದೆ ಏನು ಮಾಡಬೇಕು ಎಂಬುದರ ಬಗ್ಗೆ ಆಟಗಾರರಿಗೆ ಗೊತ್ತಿದೆ. ವಿಶೇಷವಾಗಿ ಭಾರತೀಯ ಯುವ ಆಟಗಾರರ ಮುಂದಿನ ಪ್ರದರ್ಶನದ ಬಗ್ಗೆ ಉತ್ಸುಕನಾಗಿದ್ದೇನೆ,” ಎಂದು ಸನ್‌ ರೈಸರ್ಸ್ ಹೈದರಾಬಾದ್‌ ನಾಯಕ ತಿಳಿಸಿದರು.

loading...